Тоғлар ўсган сайин, елканг кичраяр,
Елканг чўкаётган тоғмиди дада?
Ранжимайсан боланг не деб, не қўяр,
Болангнинг мавқейи шоҳмиди дада?

Кўксим ёриб нишлади азоб,
Чўкиб кетди денгизга осмон.
Деразамни чертди изтироб,
Мен сен бўлиб туғилганим он,
Кетдинг...

Бир ютум шафақни симирди қуёш,
Пуштиранг булутга артди лабларин.
Бир аёл туш кўрди
ҳув жингалак соч,
Ғамдан йироқ бўлган гўдак вақтларин.

КУМУШГА МАКТУБ

Аламни сиёхга кўмишга,
Қаламни сиёхлаб юмушга.
Юздаги ҳолимга ботириб,
Мактублар ёзаман Кумушга.

Сиз менга кераксиз…

Қадамингиз етган, етмаган йўллар,
Сиз кетиб, сиз билан кетмаган йўллар,
Қўл тутсангиз титраб, мушт тугилган-у,
Истаб, қўлингизни тутмаган қўллар
титроғи ҳаққи
Сиз менга кераксиз…

Нелардир ахтариб кетиб бораман,
Олдинда Тошкенту ортда Самарқанд.
Она, мен манзилга етиб бораман,
Ахир ёдимда-ку ўзинг берган панд.

Эҳтимол яшадим мулжалдан нари,
Гуноҳим кўп бўлди умр йўлимда.
Қулоғи динг бўлган оҳу сиргари,
Қурқиб яшадим-ку ўнг-у, сўлимдан.

ЕТИМ ХАҚҚИН ЕГАНЛАРГА

Мудом бўлсин қўлларинг узун,
Оёқларинг кетмасин тойиб.
Кўзларинг хеч бўлмасин маҳзун,
Кундан-кунга кетавер бойиб.

Мени эсламоқчи бўлсангиз агар,
Илк бора учрашган тонгларни эсланг!
Юракни ситратган масжид азони,
Черков қўнғироғи бонгларни эсланг!

Сен менсиз кетасан ўша жойларга,
Бунда қайғуришлар соғинчлар бекор.
Менчи чарчамайман кетингдан қувиб,
Узун кипригимга тўпланади қор.