Оғирлашиб борар қадамлар, 
Борган сарим оғирдир йўллар.
Билолмадим менга худойим, 
Синовларни қўйганми йўллаб? 

Бир куним

Юзимни онамдек силаса сабо,
Райҳон таралади кокилларимдан.
Тошларига қўшиб оқизди дарё,
Мени чақириб ол, соҳилларидан.

Нигоҳимдан чарчаб юкини қуёш,
Уфққа ташлаб кетди, кечди ва ютди.
Сени қўмсаб турган қарочиқларим,
Қуёшга осилган тунни йиқитди.

СЕН

Рангсиз тушларимга кириб келдинг сен!
Яна қайтиб келди гул, баҳорларим.
Бинафша лабида ҳанда, табассум,
Дилимдан тўкилди дилғуборларим.

ЭНГ СЎНГГИ ЯПРОҚ

Дарахтдан узилди энг сўнгги япроқ, 
Бир силкинди хазон тўшалган тупроқ.
Руҳим қат-қатига кўчди бир титроқ
Дарахтдан узилди энг сўнгги япроқ...

Қайдадир маҳзун тун шамоли эсди,
Мен ўзим тун бўлиб,сени соғиндим.
Ахир борлигингни юрагим сезди-
Сенга мафтун бўлиб,сени соғиндим.

Палахмон тош

Ердамисан,
Ойдамисан?
Кимса билмас жойдамисан?
Бағринг бунча иссиқ,
юввош,
Палахмон тош,
Палахмон тош!

Яна вужудимни босди шул титроқ,
Яна ҳаловатим учди жонимдан,
Дайдини кўрмадим сендан кексароқ
Шамол, не истарсан маним қонимдан?!

Олислаган диллар ва яқин йўллар, 
Тескари урмоқда товонда юрак. 
Аллоҳга элтгувчи чорадор қўллар, 
Менга бахт исми бор дуолар керак! 

Йўл қиссаси
(Епифания)
Ори Рустамжоновага

Йилим, хуш қол энди,
биз кетаяпмиз.
Қайтмас бўлиб кетамиз. 
Йил нима ўзи?
 Замон нима?
Яшадикми замонингда, йилим?
Бир оёғимиз осмонда мудом
Бириси гўрда
Бу оралиқда қадам ташлолмаймиз
Айрилар путимиз
Ёрилар чотимиз.